مغنواتى الوطن ينشد من طرة

[ 1 ]
مغنواتي الوطن على الفيل يستشرف المستقبل

ثورة الجوع

جايه جايه

جايه من بعد إنتظار

ثورة جايباها

كفاية

وغد .. نور الشمس نار

ثورة بإيدين الغلابا

و العمل و يا اليسار

و إشتراكي

قومي ثاير

ثورة جايه بالنهار

ثورة الشعب اللي عايش

تحت خط الفقر .. دار

ثورة .. بكره الثورة جايه

ياما ظالم راح و غار

مهما طال الليل علينا

لينا عند الظلمة .. تار

و اللي نايم .. بكره يصحى

و اللي صاحي

صحته .. عار

بكره نور الشمس طالع

و الخبر .. جايلنا سار

م المزارع

و الشوارع

م الكنايس

و الجوامع

من بعيد نفس الشعار

البلد دي حره

و إحنا

إتخلقنا للنهار ده

غصبن ع اللي حاكم فينا

غصبن عن هذا الحمار

اللي رافض كل حاجه

و بفساده عقله طار

بكره يتحاكم قصادنا

و اللي يحكم .. مستشار

أو رصاصة تيجي غلطه

و يعلنوا إنه .. انتحار

كافه الأحوال يا ظالم

التاريخ .. أخد قرار

التاريخ .. أخد قرار

[ 2 ]

من شباب مصر المعتقل إلى بنات مصر في سجن القناطر .مغنواتي الوطن علي الفيل

من سجن طره تحقيق

بإسم الشباب المعتقل

لبنت و بصوتها الجرئ

فاعنيها شايفين الامل

إصحي يا مصر حتي بناتك ف السجون

إصحي يا مصر خيرة الشباب ليكي يهون

آدي ندا قد النِدا

مصرية حرة و بجنون

و آدي رشا

عقد الكرامة ف صدرها

حالف يكون

و آدي أسماء

إللي ضحكة سنها

تملا العيون

و بنات على حب الوطن

اتجمعوا

لجلن نكون

باسم الشباب المعتقل

يا مصر مدوا فرحتك

بين السجون و المعتقل

لموا شبابك يا بلد

لموا البنات سجنوا الأمل

خافوا الديابه

لما شافوا بنت مصريه ..بطل

واقفه و بصوتها اللي زلزل

و اللي صابهم بالشلل

و اللي واقفه جنب أخوها

و بشجاعه بدون خجل

و اللي حالفه لم تطاطي

واقفه صابره كما الجمل

باسم الشباب المعتقل

ألفين تحيه يا ندى

ألفين تحيه يا رشا

و ألفين لأسماء اللي

ضحكتها ... عسل

من طرة

8/5/2006علي الفيل مغنواتي الوطن